मुंबई : लोकसभेत २८ जुलै रोजी झालेल्या कामकाजात खासदार धनंजय महाडिक यांनी, गणेशमूर्तीवर आकारण्यात आलेल्या ‘जीएसटी’ला जोरदार विरोध दर्शवला.
लोकसभा अध्यक्षा सुमित्रा महाजन यांच्या अध्यक्षतेखाली झालेल्या चर्चेत खासदार महाडिक म्हणाले, ‘कोणत्याही कार्याची सुरुवात श्री गणेशाच्या पूजनाने होते. तसेच संपूर्ण देशभरात गणेशोत्सव मोठ्या उत्साहात साजरा होतो. सर्व जातिधर्मांचे लोक या उत्सवात हिरिरीने सहभागी होतात. अशा परिस्थितीत देवदेवतांच्या मूर्तींवर २८ टक्के जीएसटी आकारण्याच्या सरकारच्या निर्णयामुळे गणेशमूर्ती महागणार आहेत. प्रत्येक वर्षी मूर्तीसाठी लागणाऱ्या कच्च्या मालाच्या दरात आठ ते १० टक्के वाढ होते. अशातच जीएसटी लागू झाल्यामुळे मूर्तींचे दर खूपच वाढणार आहेत.’ १५ फुटी गणेशमूर्तीची किंमत २५ ते ३० हजार रुपयांनी वाढणार असल्याचे उदाहरण त्यांनी सभागृहाला दिले.
हा प्रश्न सर्वसामान्यांच्या आस्था आणि भावनेचा असल्याचे नमूद करून, खासदार महाडिक यांनी जीएसटी लागू करण्याच्या या निर्णयाला विरोध दर्शविला. ‘विशेषतः महाराष्ट्रात सार्वजनिक गणेशोत्सव मोठ्या प्रमाणात साजरा होतो. प्रत्येक गावात आणि शहरात त्यासाठी तरुण मंडळे कार्यरत असतात. या सर्वांनाच या निर्णयाचा फटका बसणार आहे,’ असे त्यांनी सांगितले.
‘मुंबईतील लालबागचा राजा गणेशोत्सव मंडळ, पुणे येथील दगडूशेठ हलवाई गणेश मंडळ आणि कोल्हापुरातील सर्वच सार्वजनिक गणेशोत्सव मंडळांचा या निर्णयाला तीव्र विरोध आहे. बहुतांश मंडळांनी आणि गणेशभक्तांनी मे आणि जून महिन्यातच मूर्तीची नोंदणी केली आहे; पण जुलैनंतर जीएसटी लागू झाल्यामुळे, या सर्व भक्तांना जादा पैसे मोजावे लागणार आहेत. देवाची मूर्ती ही श्रद्धा आणि आस्थेची बाब असून, मूर्तींवर लादलेला जीएसटी तत्काळ हटवावा,’ अशी आग्रही मागणी खासदार महाडिक यांनी लोकसभेत केली. ‘संबंधित खात्याकडे आपल्या भावना पोहोचवू,’ असे अध्यक्षा सुमित्रा महाजन यांनी सांगितले.
यापूर्वी मूर्तींवर कोणताही अतिरिक्त कर लागू नव्हता; पण जीएसटी समितीने गणेशमूर्ती, तसेच इतर देवदेवतांच्या मूर्ती तयार करण्याचा व्यवसाय, कराच्या आधिपत्याखाली आणला असून, उच्चतम अर्थात २८ टक्के कर लागू केला आहे. त्यामुळे भाविक आणि मूर्तिकार या दोन्ही घटकांना फटका बसणार आहे.